კომპანია Apple დეველოპერების ყოველწლიურ კონფერენციას - WWDC 2023-ს მასპინძლობს, რომელიც 5-დან 9 ივნისამდე გაიმართება. 5 ივნისს, კონფერენციის პირველ დღეს, Apple-მა მნიშვნელოვანი სიახლეები გააცნო მომხმარებელს, მათ შორის ერთ-ერთი ყველაზე მთავარი, ახალი მოწყობილობა - Apple Vision Pro იყო. შერეული რეალობის ახალი სათვალე, Apple-ის ინოვაციურ პროდუქტს წარმოადგენს. აღსანიშნავია, რომ კომპანია უკვე წლებია მუშაობს AR და VR ტექნოლოგიის შექმნასა და გაუმჯობესებაზე.

Apple Vision Pro-ს დიზაინი ერთი შეხედვით სათხილამურო სათვალეებს მოგვაგონებს, მოწყობილობა კონტროლირებადია თვალების, ხელებისა და ხმის გამოყენებით. სათვალე აერთიანებს ვირტუალურ და გაფართოებულ რეალობებს, მისი საშუალებით რამდენიმე დავალების შესრულება ერთდროულადაა შესაძლებელი, მათ შორის ფილმების ყურება და სხვადასხვა სამუშაოს შესრულება. 

Apple Vision Pro-ს საწყისი ფასი $3 499 დოლარიდან დაიწყება. 

ღონისძიებაზე ახალი თაობის, 15 დიუმიანი MacBook Air-იც წარადგინეს, რომელიც აღჭურვილია Apple-ის M2 ჩიპით და რვა ბირთვიანი პროცესორით. ახალი მოდელის სისქე 11.5 მმ-ია, რაც კომპანიის თქმით, მას მსოფლიოში ყველაზე თხელ ლეპტოპად აქცევს. ეკრანის რეზოლუცია 2880 x 1864-ს შეადგენს, მისი საწყისი ფასი $1 299 დოლარი იქნება. 

კონფერენციაზე Apple-მა ახალი ოპერაციული სისტემების - iOS 17-ის, iPadOS 17-ის, macOS და watchOS 10-ის შესახებაც ისაუბრა.