იმისათვის რომ ჩვენი სამუშაო გარემო უფრო კომფორტული და სასარგებლო გავხადოთ, მნიშვნელოვანია ინტერიერი მცენარეებით გავამდიდროთ. როგორც ვიცით მცენარეები გამოყოფენ ჟანგბადს და ასუფთავებენ ჰაერს. ოფისებში, სადაც მუდმივად სხვადასხვა მოწყობილობაა ჩართული და ერთგვარი გამოსხივება იქმნება, ეს ნამდვილად საჭიროა. ჟანგბადის გარდა, ყვავილების საშუალებით ოფისის ინტერიერი უფრო ცოცხალი და მრავალფეროვანი ხდება. აღსანიშნავია ისიც, რომ ეკომეგობრულ გარემოში ადამიანების შრომისუნარიანობა და კრეატიულობა იზრდება. 

თუმცა ოფისისთვის მცენარის შესარჩევად სხვადასხვა ფაქტორი უნდა გავითვალისწინოთ, მათ შორის ყველაზე მთავარია - განათება. მცენარეების დიდი ნაწილისთვის სასიცოცხლოდ მნიშვნელოვანია სინათლე, სწორედ ამიტომ თუ ოფისი ნაკლებად განათებულია, უმჯობესია ისეთი ყვავილი შევარჩიოთ, რომელიც იტანს მსგვას გარემოს. დეკორატიულობისა და ესთეტური გარემოს შექმნის მხრივ, კარგი იქნება თუ დიდფოთლოვან ყვავილებს, იმ ოთახებში მოვათავსებთ, რომლებიც ავეჯით ნაკლებად გადატვირთულია. 

გავიცნოთ რამდენიმე მცენარე, რომლებიც შეგვიძლია ოფისს შევუხამოთ: 

1. ფიკუსი

არსებობს ფიკუსის სხვადასხვა ჯიში, თუმცა ამ მცენარის დიდ ნაწილს სწორედ განათებული ადგილი უყვარს. ფიკუსისთვის შეგვიძლია ხელოვნური განათებაც შევარჩიოთ. მცენარეს სჭირდება ზომიერი მორწყვა, თბილი ან დაყენებული წყლით. გავრცელებული მოსაზრებით ფიკუსი ოთახს უარყოფითი აურისგან იცავს. 

2. დრაცენა

დრაცენა სწორედ ის მცენარეა, რომელსაც ჩრდილი უყვარს. მცენარისთვის უმჯობესია ოთახში ტემპერატურა 20-25 გრადუსს შეადგენდეს. დრაცენა ერთ-ერთი ყველაზე მარტივად მოსავლელი ოთახის მცენარეა. 

3. ჟასმინი

ინტერიერისთვის განსაკუთრებით ლამაზი მცენარეა - ჟასმინი. მისთვის საჭიროა უხვად განათებული ადგილისა და სწორი ტენიანობის შერჩევა. ითვლება, რომ ჟასმინი წარმატების მომტანი მცენარეა. 

4. კალანჰოე

ოფისისთვის ერთ-ერთი იდეალური ვარიანტია - კალანჰოე. მცენარე ბევრ მოვლას არ საჭიროებს და აქვს ძალიან ლამაზი ფოთლები. 

5. ზამიოკულკასი

ეს მცენარე, განსაკუთრებით ფენ შუის მიმდევრებს უყვართ. გავრცელებული მოსაზრებით ზამიოკულკასი ბედნიერებისა და სიმდიდრის მომტანი ყვავილია.