ბოლო პერიოდში, ინტერნეტ სივრცეში განსაკუთრებული პოპულარობით სარგებლობს მობილური აპლიკაცია FaceApp, რომელიც რუსული სტარტაპია და პეტერბურგელი დეველოპერების მიერ შეიქმნა.
2017 წელს შექმნილი გასართობი პლატფორმა დეველოპერებმა ახლახანს განაახლეს, სწორედ მას შემდეგ მიაღწია აპლიკაციამ პოპულარობის პიკს და Forbes-ის მონაცემებით, ის უკვე 150 მილიონზე მეტმა ადამიანმა გამოიყენა.
აპლიკაციას შეუძლია ადამიანებს კანის ფერი, ასაკი და სქესი შეუცვალოს. FaceApp ხელმისაწვდომია როგორც Android-ის, ასევე iOS-ის პლატფორმაზე.
მომხმარებლის დიდი ნაწილი, გამოყენებამდე წაუკითხავად ეთანხმება FaceApp-ის „წესებს და პირობებს“ სადაც წერია, რომ მათ შეუძლიათ მომხმარებლის მიერ აპლიკაციაზე გაცემული მონაცემები გაუზიარონ მესამე პირს, მათთან დაკავშირებულ ჯგუფებსა და ორგანიზაციებს.
იმისთვის, რომ აპლიკაციის სახალისო ფუნქციებით ისარგებლოთ, აუცილებელია წვდომა მისცეთ თქვენს სრულ ფოტო ალბომზე, ასევე Siri-ზე და საძიებო სისტემებზე. აღსანიშნავია, რომ აპლიკაციას მაშინაც კი აქვს წვდომა ამ ყველაფერზე, როცა მას არ იყენებთ.
ექსპერტები კი გვაფრთხილებენ რომ თანამედროვე სამყაროში, სახის ამოცნობა, წარმოადგენს ჩვენი ციფრული იდენტობის ძირითად ელემენტს. გასათვალისწინებელია რომ ჩვენი ინფორმაცია FaceApp-მა შესაძლოა გამოიყენოს სხვადასხვა მარკეტინგული ან პოლიტიკური მიზნებითაც:
„შესაძლოა, ერთ დღეს სადმე, მოსკოვში ბილბორდზე აღმოჩნდეთ, მაგრამ უფრო მეტი ალბათობაა, რომ თქვენი სახე ხელოვნური ინტელექტის სახის ამოცნობის ალგორითმის გასაწვრთნელად გამოიყენონ“ – Phonearena, Peter Konstadinov
FaceApp გამოეხმაურა ინფორმაციულ უსაფრთხოებასთან დაკავშირებით მიმდინარე მოვლენებს და რამდენიმე პუნქტიანი განცხადება მიუძღვნა უსაფრთხოების რეგულაციებს. მათი განცხადებით, აპლიკაცია უსაფრთხოა, - მომხმარებლის უმრავლესობა არ გადის ავტორიზაციას, შესაბამისად, უმეტეს შემთხვევაში, ფოტოების კონკრეტულ პიროვნებებთან დაკავშირება შეუძლებელია. ასევე, ხაზს უსვამენ, რომ აპლიკაცია მხოლოდ იმ ფოტოებს იღებს, რომელსაც მომხმარებელი ირჩევს და არ აქვს შეხება სრულ Camera Roll-თან, ან ფოტო ალბომებთან. ისინი ირწმუნებიან, რომ ფოტოების უმრავლესობა ატვირთვიდან 48 საათში იშლება. ასევე, არ ადასტურებენ ინფორმაციას, რომ მომხმარებლის მონაცემები რუსეთში იგზავნება - აცხადებენ, რომ იყენებენ Google Cloud-ს. დამფუძნებელი უარყოფს მესამე პირზე ინფორმაციის გაცემის შესაძლებლობასაც.
ვიდრე სრული სიმართლე გვეცოდინება, ისღა დაგვრჩენია უსაფრთხოების წესები მაქსიმალურად დავიცვათ :
- გააძლიერეთ უსაფრთხოების ეტაპები თქვენს მოწყობილობებსა და ონლაინ პლატფორმებში, ჩართეთ 2 ეტაპიანი ავტორიზაცია ყველგან, სადაც შესაძლებელია.
- თუ უკვე გამოიყენეთ FaceApp, თქვენი მონაცემების წაშლა შეგიძლიათ შემდეგნაირად მოითხოვოთ:
გახსენით აპლიკაცია და მიჰყევით ინსტრუქციას: Settings->Support->Report a bug. Subject-ში ჩაწერეთ “Privacy” და გააგზავნეთ მონაცემების წაშლის მოთხოვნა.
