კომპანია Samsung-ის განცხადებით, Galaxy Unpacked 2020-ის ღონისძიება 5 აგვისტოს, ონლაინ რეჟიმში გაიმართება. შეგახსენებთ რომ პრეზენტაციაზე წარმოდგენილი იქნება Galaxy Note 20 სერიის სმარტფონები და ახალი თაობის Galaxy Fold. ცოტა ხნის წინ Samsung-მა ღონისძიების ვიდეო თიზერიც გამოაქვეყნა. ინფორმაციას აღნიშნულის შესახებ ვებ გვერდი - The Verge გამოეხმაურა.
რამდენიმე დღის წინ ინტერნეტ სივრცეში, Note 20 Ultra-ს სავარაუდო სურათები გავრცელდა, რომელიც სპილენძისფერ კორპუსშია წარმოდგენილი. Samsung-ი ახალი სმარტფონების შესახებ ჯერჯერობით ოფიციალურ ცნობებს არ ავრცელებს. გავრცელებული ინფორმაციით ფლაგმანები Qualcomm’s Snapdragon 865 ან Snapdragon 865 Plus პროცესორებით იქნება აღჭურვილი, ეს უკანასკნელი კი სმარტფონში 5G მხარდაჭერას უზრუნველყოფს. აღსანიშნავია ისიც რომ Note 20 სერიაში S-Pen-ს ისევ ვიხილავთ.
რაც შეეხება კიდევ ერთ ფლაგმანს - Galaxy Fold-ის მომდევნო სმარტფონს, შესაძლოა Galaxy Z Fold 2 ერქვას.
წინა წელს კომპანია Samsung-მა ღონისძიება Unpacked 2019-ზე, რომელიც ნიუ-იორკში გაიმართა, Note 10 და Note 10 Plus სმარტფონები წარადგინა.