აპლიკაციების მაღაზიები ყოველდღიურად გვთავაზობენ სიახლეებსა და გვიმარტივებენ ცხოვრებას. ტექნოლოგიების ერთ-ერთი ცნობილი ბლოგი Techrader-ი სხვადასხვა კვლევის საფუძველზე, ყოველკვირეულად აქვეყნებს სასარგებლო და უფასო აპლიკაციების სიას.
სიაში პირველი, ყველასთვის ცნობილი, აპლიკაცია Shazam-ია, რომელიც ერთ-ერთი საუკეთესო მუსიკის ამომცნობია. მისი ბოლო განახლების შემდეგ, მომხმარებელს სასურველი სიმღერის იდენტიფიცირება ყურსასმენის საშუალებითაც შეუძლია. ახალი ფუნქცია, ჯერჯერობით, მხოლოდ Android-ის მომხმარებლებისთვისაა ხელმისაწვდომი და მალე დაემატება App Store-ში.
აპლიკაცია Google Arts and Culture ხელოვნების მოყვარულთათვის განსაკუთრებით საინტერესოა. აპლიკაცია მომხმარებელს აძლევს საშუალებას, იხილოს ცნობილი ნამუშევრების მაღალი ხარისხის ციფრული ვერსიები, ვირტუალურად დაათვალიეროს მუზეუმები, მოძებნოს საინტერესო ადგილები და ა.შ.
აპლიკაცია Sticker Maker დაგეხმარებათ, შექმნათ საკუთარი „სტიკერები“, რომლებიც შეგიძლიათ შემდეგ WhatsApp-ში მეგობრებს გაუზიაროთ.
ბუნებისა და მცენარეების მოყვარულებს განსაკუთრებით დააინტერესებთ აპლიკაცია - Smart Plant. ეს არის ერთგვარი მონაცემთა ბაზა, სადაც თავმოყრილია ინფორმაცია სხვადასხვა მცენარის სახელწოდების, მოვლის სპეციფიკისა და სხვა თავისებურებების შესახებ.
თუ უცხო ენის სწავლას გადაწყვეტთ, აპლიკაცია - Duolingo: Learn Languages Free - ის მეშვეობით შესაძლებელია დაეუფლოთ თქვენთვის სასურველ ენას. აპლიკაცია სასარგებლო გაკვეთილებს, სავარჯიშოებსა და ტესტებს გთავაზობთ.
კითხვის მოყვარულთათვის Goodreads ერთ-ერთი საუკეთესო უფასო აპლიკაციაა. მომხმარებლებს ეძლევათ შესაძლებლობა შეაფასონ წაკითხული წიგნები, მონიშნონ ის ნაწარმოებები, რომლის წაკითხვასაც გეგმავენ და გამოიწერონ საინტერესო სიახლეები ლიტერატურის შესახებ.
თუ აეროპორტში გზამკვლევი გჭირდებათ, ამაში Flio დაგეხმარებათ. აპლიკაცია გირჩევთ როგორ მოხვდეთ დანიშნულების ადგილას, მარტივად. ასევე მიგითითებთ სად არის კაფე და დასასვენებელი ოთახი.
